Sælir strákar !!
Æfingin áðan var fín að mörgu leyti. Leikmenn voru að spila stöður á 11 manna velli sem þeir hafa aldrei gert áður og sást það vel að við þurfum að æfa okkur vel í leikskipulagi bæði í sóknaraðgerðum og varnaraðgerðum. Ég ætla í þessu bloggi að fara yfir ákveðna punkta út frá hverri stöðu sem leikmenn verða að hafa á hreinu ef þeir ætla sér að spila árángursríkan fótbolta næsta sumar.
Við byrjum á varnarleiknum en hann er undirstaðan í að ná árangri. Með varnarleik er ég ekki eingöngu að tala um öftustu línuna sem eru tveir bakverðir og tveir miðverðir. Ég er að sjálfsögðu að tala um varnarleikinn hjá liðinu í heild en varnarskyldan byrjar hjá fremsta manni sem á að vera duglegur að djöflast í varnarmönnum hins liðsins svo hann fái engan frið til þess að bera upp boltan.
Þegar við erum að verjast er best að við þéttum liðið sem best, þannig að erfitt sé að spila okkur í sundur. Kantmenn eiga að að þétta inn á miðjuna og hjálpa miðjumönnunum að vinna boltann. Það segir sig sjálft strákar að ef við erum þéttir fyrir og nennum að sinna okkar varnarskyldum er miklu erfiðara að komast í gegnum vörn okkar og skora.
Miðverðir : Eru leikmenn sem eru hjarta varnarinnar. Þeir bera ábyrgð á að stjórna varnarleiknum og eiga að láta vel í sér heyra og stjórna miðjumönnunum fyrir framan sig. Þeir verða að passa sig að vera ekki of flatir og eiga að dekka vel upp fyrir hvorn annan. Þegar liðið þeirra er með boltann og eru í sókn er stranglega bannað að horfa á og vera lengi að koma sér út úr vörninni. Gott að setja sér viðmið að vera rétt fyrir aftan miðjuna. Þessir leikmenn þurfa að geta unnið alla skallabolta og tæklingar og lesa leikinn mjög vel. Bestu leikmenn i þessari stöðu eru t.d John Terry, Nemanja Vidic ofl.
Miðjumenn eru lykilmenn í að stjórna leiknum, ef við erum með yfirburði á miðjunni þá get ég lofað því að það er líklegra að við vinnum leiki en ekki.
Varnarmiðjumaður þarf að halda svæði sínu vel og má ekki hlaupa óþarfa hlaup út úr stöðu nema hann sé viss um að einhver annar taki stöðu hans á meðan hann fer með í sóknina. Hans hlutverk er að vinna alla lausa bolta á miðjunni, allar tæklingar, skallabolta og það mikilvægasta að vernda varnarmenn okkar en þá er ég aðalega að tala um miðverðina tvo, hann á líka að stýra hinum miðjumönnunum og láta vel í sér heyra. Einnig á Varnarmiðjumaðurinn að vera vakandi fyrir því ef bakvörðurinn fer upp með boltann í sóknarleikinn að loka því gati sem hann skilur eftir sig þar. Hann á að loka sendingarleiðum á sóknarmennina þeirra og miðjumenn og passa það að miðjumenn komist ekki á vörnina með boltann svo varnarmennirnir þurfi að rjúka út í manninn en þá myndast oft hola fyrir aftan vörnina sem klókir senterar nýta sér gjarnan. Einng er varnarmiðjumaður gríðarlega mikilvægur í uppspili þar sem hann getur verið að dreifa boltanum frá hægri til vinstri kants ef hann er góður á boltann. Bestu leikmenn í heimi í þessari stöðu eru t.d í dag Xabi Alonso,Michael Essien.Javier Mascerano.
Miðjumaður CM. Leikmaður sem spilar á miðri miðjunni á að sjálfsögðu að hafa alla þessa þætti á hreinu sem varnarmiðjumaðurinn hefur. Hann má þó hafa frjálsara hlutverk fram á við og verður þessi leikmaður að vera með mikið þol, en hann þarf að geta hlaupið frá teig til teigs. Þessi leikmaður er oft primus mótorinn í líðinu og þarf að vera sterkur karakter. Hann er alltaf á hreyfingu og bjóða sig til þess að gera sig líklegan til að fá boltann. Hann bindur vel saman sóknar og varnarleik og þessi leikmaður á að fá boltann mikið í fætur.
Sóknarmiðjumaður Hlutverk hans er jafnvmikilvægt í vörn sem sókn. Þessi leikmaður á að vera gríðarlega góður á boltann og búa yfir mikillri boltatækni. Hann á að vera eins og hinir miðjumennirnir með mikla hreyfingu án boltann og vera duglegur að bjóða sig í holunni á milli miðju og varnarmenn andstæðingana. Þessi miðjumaður þarf að hafa mikinn leikskilning og verður að geta séð fyrir hlaup sem kantmenn og senterar eru að gera og sent í eyðurnar sem þeir geta nýtt sér. Mesta hættan í fótbolta leik myndast oft þegar að þessi leikmaður nær að fá boltann á sóknarhelming og nær að koma á miklum hraða á vörnina, þá getur hann valið um að senda úrslitasendingu inn fyrir eða sólað varnarmanninn sjálfur og fara í sókn.
Bakverðir/Kantmenn : Eru oftast fljótir og með góða spyrnutækni. Ef að gott kantspil á að myndast er mikilvægt að þegar hans lið er með boltann að hann les leikinn rétt og dregur sig út á hliðarlínu til þess að skapa sér meira pláss. Hann á líka að vera duglegur að stinga sér inn fyrir vörn andstæðingana. Gott kantspil myndast oft á milli bakvarðar og kantmanns þegar að bakvörðurinn kemur með í sóknina og tekur utanáhlaup við kantamanninn. Þessi hlaup eru gríðarlega mikilvæg í nútímafótbolta. Í varnarleik á hann að þétta vel inn á miðju en hafa alltaf sjónar á kantmanninum sínum sem hann á að dekka.Bakvörðurinn verður að gegna varnarskyldum sínum vel og passa að ekki sé hægt að setja háan bolta yfir hausinn á sér svo andstæðingurinn komist upp að endamörkum. Hann þarf að stjórna vörninni með hinum varnarmönnum og þarf að passa sig á því að vera alltaf í linu vegna rangstöðunnar. Bestir í þessari stöðu í heimi í dag eru sem kantmenn : Gareth Bale, Ashley Young, Angel Di maria
Í bakverði eru það : Ashley Cole, Patrice Evra, Daniel Alves og Philip Lahm.
Senterar: Eiga að sinna varnarskyldunni sinni jafnvel og hinir. Þeir eiga að liggja í öftustu varnarmönnum hins liðsins og nýta sér öll mistök sem þeir gera og vera fljótir að refsa. Þeir eiga alltaf að vera bjóða sig og gera sig líklega til þess að fá stungusendingu inn fyrir og skora mörkin. Klókir senterar lesa leikinn mjög vel og staðsetja sig oft mjög vel. Hann þarf að hafa hraða,boltatækni,skallatækni ofl. Það getur verið gulls ígildi að hafa góðan senter sem skorar mörk og leggur upp. Bestir í heimi eru : Ronaldo, Rooney, Luis Suarez og Messi.
Ég hvet ykkur alla til þess að lesa þetta mjög vel og pæla vel í þessu en við ætlum að setja upp smá töflufund bráðum áður en við tökum okkar fyrsta æfingaleik sem verður líklega næstkomandi laugardag gegn Aftureldingu. Strákar nú bið ég ykkur um að kikja á bloggið á daglega því við ætlum núna að fara að vera duglegri að blogga og koma með allskyns fróðleik. Varðandi mætingu leikmanna þá þarf hún að vera miklu betri hjá sumum en við þufum að æfa vel í vetur svo það skila sér út á vellinum í sumar. Æfingin skapar meistarann
Sjáumst ferskir á Þriðjudaginn kl. 18.30 í safamýri
Ps. svo fer gervigrasið í grafarholtinu að vera tilbúnir og við látum ykkur vita hérna á blogginu með nýja æfingatöflu.
Kveða Villi